hataao aaina ummiid vaar ham bhi hain

HaTaao aa.ina ummeed-vaar ham bhee hain Tumhaare dekhne vaalon men yaar ham bhee hain TaDap ke ruuh ye kahtee hai hijr-e-jaanaan men Ki tere saath dil-e-be-qaraar ham bhee hain Rahe dimaagh agar aasmaan pe duur naheen Ki tere kooche men mast-e-ghubaar ham bhee hain Kaho ki nakhl-e-chaman ham se sar-kashee na karen Unheen kee tarah se baagh-o-bahaar ham bhee hain Hamaare aage zaraa ho samajh ke zamzama-sanj Ki ek naghma-saraa ai hazaar ham bhee hain Kahaan tak aa.ine men dekh-bhaal idhar dekho Ki ik nigaah ke ummeed-vaar ham bhee hain Sharaab munh se lagaate naheen hain ai zaahid Firaaq-e-yaar men parhez-gaar ham bhee hain Hamaaraa naam bhee likh lo jo hai qalam jaaree Qadeem aap ke khidmat-guzaar ham bhee hain Humaa hain gird miree haDDiyon ke aaTh pahr Sag aa ke kahte hain ummeed-vaar ham bhee hain Jo laDkhaDaa ke gire too qadam pe saaqee ke 'ameer' mast naheen hoshyaar ham bhee hain