jab se baandhaa hai tasavvur us rukh e pur nuur kaa

Jab se baandhaa hai tasavvur us rukh-e-pur-noor kaa Saare ghar men nuur phailaa hai charaagh-e-toor kaa Bakht-e-vaazhoon se jale kyuun dil na mujh mahroor kaa Marham-e-kaafoor se munh aa gaya naasoor kaa Is qadar mushtaaq hoon zaahid khuda ke nuur kaa But bhee banvaayaa kabhi main ne to sang-e-toor kaa Tujh ko laa.e ghar men jannat ko jalaayaa rashk se Ham-baghal tujh se hue pahloo dabaayaa huur kaa Gor-e-kaafir kis liye hai teera-o-taar is qadar PaD gaya saaya magar meree shab-e-deejoor kaa Husn-e-yoosuf aur tere husn men itnaa hai farq ChoT ye nazdeek kee hai vaar thaa wo daur kaa Qasr-e-tan bigDaa kisee kaa gorkan kee ban paDee Ghar kisee kaa gir paDaa ghar bin gaya mazdoor kaa Chehra-e-jaanaan se sharmaa kar chhupaayaa khuld men Khaama-e-taqdeer ne kheenchaa jo naqsha huur kaa Haajat-e-mushshaata kya rukhsaar-e-raushan ke liye Dekh lo gul kaaTtaa hai kaun sham-e-toor kaa Zulf-o-roo-e-yaar se nairang-e-qudrat hai ayaan Mahr ke panje men hai daaman shab-e-deejoor kaa Khaaksaaree kar jo ho manzoor aankhon men jagah Khaak ho kar surma bin jaataa hai patthar taur kaa Ghaafilon ke kaan kab khulte hain san kar shor-e-hashr Sone vaalon ko jagaa saktaa nahin ghul duur kaa Poochh lenaa sab vatan kaa haal ai ahl-e-adam Baith lene do zaraa aataa hoon uTThaa daur kaa Ijz karte hain adoo-e-jaan se bhee khaasaan-e-haq Jhuk gaya sar aage paa-e-daar par mansoor kaa Maut kya aa.ee tap-e-furqat se sehat ho ga.ee Dam nikalne se badan ThanDaa huaa ranjoor kaa Jaate hain mai-khaana-e-aalam se ham soo-e-adam Kah do az-khud-raftagee se hai iraada duur kaa Mooziyon ko haadson se dahr ke kya khauf hai Baarish-e-baaraan se ghar girtaa nahin zamboor kaa Chashm-e-saaghar be-sabab har dam lahoo rotee nahin Mughbachon se saaqiyaa dil phaT gaya angoor kaa Jaate hain mai-khaana-e-aalam se ham soo-e-adam Kah do az-khud-raftagee se hai iraada duur kaa Kee nazar jis par kudoorat se raha khaamosh wo Hai asar gard-e-nigaah-e-yaar men sindoor kaa Jalva-e-maashooq har jaa hai baseerat ho agar Kirmak-e-shab-taab men aalam hai sham-e-toor kaa Mar ke yaaraan-e-adam ke paas pahunchoongaa 'ameer' Chalte chalte jaan jaa.egee safar hai duur kaa