kis ke chamke chaand se rukhsaar qiasar baag men
— Ameer Minai
Kis ke chamke chaand se rukhsaar qaisar-baagh men
Chaandnee hai saaya-e-deevaar qaisar-baagh men
Fil-haqeeqat ye bhee kam gulzaar-e-jannat se naheen
Hooren phirtee hain sar-e-baazaar qaisar-baagh men
Paanv kaa yaan zikr kaisaa saaf hai aisi zameen
Dil phisalte hain dam-e-raftaar qaisar-baagh men
Zer-e-shaakh-e-gul agar sabza kabhee sone lagaa
Shor-e-bulbul ne kiyaa bedaar qaisar-baagh men
Itne patte bhee na honge gulshan-e-firdaus men
Jis qadar phoolon ke hain ambaar qaisar-baagh men
Tishnigaan-e-shauq hain sheereen-labon ke mehmaan
BaT raha hai sharbat-e-deedaar qaisar-baagh men
Qatre shabnam ke rag-e-gul par dikhaate hain bahaar
Gundh rahe hain motiyon ke haar qaisar-baagh men
Saaya-e-baal-e-humaa kya DhoonDhtaa hai ai 'ameer'
Baith zer-e-saaya-e-deevaar qaisar-baagh men