phuulon men agar hai buu tumhaarii
— Ameer Minai
Phoolon men agar hai boo tumhaaree
KaanTon men bhee hogee khoo tumhaaree
Us dil pe hazaar jaan sadqe
Jis dil men hai aarzoo tumhaaree
Do din men guloo bahaar kya kee
Rangat wo rahi na boo tumhaaree
ChaTkaa jo chaman men ghuncha-e-gul
Boo de ga.ee guftugoo tumhaaree
Mushtaaq se duur bhaagtee hai
Itnee hai ajal men khoo tumhaaree
Gardish se hai mahr-o-mah ke saabit
Un ko bhee hai justujoo tumhaaree
Aankhon se kaho kamee na karnaa
Ashkon se hai aabroo tumhaaree
Lo sard huaa main neem-bismil
Puuree huee aarzoo tumhaaree
Sab kahte hain jis ko lailatul-qadr
Hai kaakul-e-mushk-boo tumhaaree
Tanhaa na phiro 'ameer' shab ko
Hai ghaat men har adoo tumhaaree