puuchhaa na jaaegaa jo vatan se nikal gaya

Poochhaa na jaa.egaa jo vatan se nikal gaya Be-kaar hai jo daant dahan se nikal gaya Thahren kabhi kajon men na dam bhar bhee raast-rau Aayaa kamaan men tiir to san se nikal gaya Khil.at pahan ke aane kee thee ghar men aarzoo Ye hausla bhee gor-o-kafan se nikal gaya Pahloo men mere dil ko na ai dard kar talaash Muddat huee ghareeb vatan se nikal gaya Murghaan-e-baagh tum ko mubaarak ho sair-e-gul KaanTaa tha ek main so chaman se nikal gaya Kya rang teree zulf kee boo ne uDaa diyaa Kaafoor ho ke mushk khutan se nikal gaya Pyaasaa hoon is qadar ki miraa dil jo gir paDaa Paanee ubal ke chaah-e-zaqan se nikal gaya Sara jahaan naam ke peechhe tabaah hai Insaan kiyaa aqeeq-e-yaman se nikal gaya KaanTon ne bhee na daaman-e-gulcheen pakaD liyaa Bulbul ko zab.h kar ke chaman se nikal gaya Kya shauq tha jo yaad sag-e-yaar ne kiyaa Har ustukhaan taDap ke badan se nikal gaya Ai sabza rang-e-khat bhee banaa ab to bosa de Begaana tha jo sabza chaman se nikal gaya Manzoor ishq ko jo huaa auj-e-husn par Qumree kaa naala sarv-e-chaman se nikal gaya Madd-e-nazar rahi hamen aisi razaa-e-dost KaaTee zabaan jo shikva dahan se nikal gaya Taa.oos ne dikhaa.e jo apne badan ke daagh Rotaa huaa sahaab chaman se nikal gaya Sahraa men jab huee mujhe khush-chashmon kee talaash Koson main aahuvaan-e-khutan se nikal gaya Khanjar khinchaa jo myaan se chamkaa miyaan-e-saf Jauhar khule jo mard vatan se nikal gaya Men sher paDh ke bazm se kiyaa uTh gaya 'ameer' Bulbul chahak ke sehn-e-chaman se nikal gaya