saaf kahte ho magar Kuch nahin khultaa kahnaa

Saaf kahte ho magar Kuch nahin khultaa kahnaa Baat kahnaa bhee tumhaaraa hai muammaa kahnaa Ro ke us shokh se qaasid miraa ronaa kahnaa Hans paDe us pe to phir harf-e-tamannaa kahnaa Misl-e-maktoob na kahne men hai kya kya kahnaa Na miree tarz-e-khamoshee na kisee kaa kahnaa Aur thoDee see shab-e-vasl baDhaa de yaa-rab Sub.h nazdeek hamen un se hai kya kya kahnaa PhaaD khaataa hai jo ghairon ko jhapaT kar sag-e-yaar Main ye kahtaa hoon mire sher tiraa kya kahnaa Har bun-e-moo-e-mizha men hain yahaan sau toofaan Ain ghaflat hai maree aankh ko Dariya kahnaa Vasf-e-rukh men jo sune sher wo hans kar bole Sher hain nuur ke hai nuur kaa teraa kahnaa Laa sakoge na zaraa jalva-e-deedaar kee taab Arinee munh se na ai hazrat-e-moosaa kahnaa Kar liyaa ahd kabhi Kuch na kahenge munh se Ab agar sach bhee kahen tum hamen jhooTaa kahnaa Khaak men zid se milaao na mire aansoo ko Sachche motee ko munaasib nahin jhooTaa kahnaa Kaise naadaan hain jo achchhon ko buraa kahte hain Ho buraa bhee to use chaahiye achchhaa kahnaa Dam-e-aakhir too buto yaad khuda karne do Zindagee bhar to kiyaa main ne tumhaaraa kahnaa PaDhte hain dekh ke us but ko farishte bhee darood Marhabaa salle-alaa salle-alaa kya kahnaa Ai buto tum jo adaa aa ke karo masjid men Lab-e-mehraab kahe naam-e-khuda kya kahnaa In haseenon kee jo taareef karo chiDhte hain Sach to ye hai ki buraa hai unhen achchhaa kahnaa Shauq ka.abe liye jaataa hai havas jaanib-e-dair Mere allaah bajaa laa.oon men kis kaa kahnaa Saaree mahfil ko ishaaron men luTaa do ai jaan Siikh lo chashm-e-sukhan-go se lateefa kahnaa GhaTte ghaTte men raha ishq-e-kamar men aadhaa Jaama-e-tan ko mire chaahiye niimaa kahnaa Men to aankhon se bajaa laataa hoon irshaad-e-huzoor Aap sunte nahin kaanon se bhee meraa kahnaa Chustee-e-tab.a se ustaad kaa hai qaul 'ameer' Ho zameen sust magar chaahiye achchhaa kahnaa