shamshiir hai sinaan hai kise duun kise na duun

Shamsheer hai sinaan hai kise duun kise na duun Ik jaan-e-naa-tavaan hai kise duun kise na duun Mehmaan idhar humaa hai udhar hai sag-e-habeeb Ik musht ustukhaan hai kise duun kise na duun Darbaan hazaar us ke yahaan ek naqd-e-jaan Maal is qadar kahaan hai kise duun kise na duun Bulbul ko bhee hai phoolon kee gulcheen ko bhee talab Hairaan baaghbaan hai kise duun kise na duun Sab chaahte hain us se jo va.ada visaal kaa Kahtaa hai wo zabaan hai kise duun kise na duun Shahzaadee dukht-e-raz ke hazaaron hain khvaast-gaar Chup murshid-e-mughaan hai kise duun kise na duun Yaaron ko bhee hai bose kee ghairon ko bhee talab Shashdar wo jaan-e-jaan hai kise duun kise na duun Dil mujh se maangte hain hazaaron haseen 'ameer' Kitnaa ye armughaan hai kise duun kise na duun