tiraa kya kaam ab dil men gam e jaanaana aataa hai

Tiraa kya kaam ab dil men gham-e-jaanaana aataa hai Nikal ai sabr is ghar se ki saahib-khaana aataa hai Nazar men teree aankhen sar men sauda teree zulfon kaa Ka.ee pariyon ke saa.e men tiraa deevaana aataa hai Vafoor-e-rahmat-e-baaree hai mai-khvaaron pe in rozon Jidhar se abr uThtaa hai soo-e-mai-khaana aataa hai Lagee dil kee bujhaa.e bekasee men kaun hai aisa Magar ik girya-e-hasrat ki be-taabaana aataa hai Unheen se ghamze kartee hai jo tujh par jaan dete hain Ajal tujh ko bhee kitnaa naaz-e-ma.ashooqaana aataa hai Pareshaanee men ye aalam tiree zulfon kaa dekhaa hai Ki ik ik baal par qurbaan hone shaana aataa hai Chhalak jaataa hai jaam-e-umr apna vaa.e-naakaamee Hamaare munh talak saaqee agar paimaana aataa hai Wo but hee mehrbaan sab apna apna haal kahte hain Lab-e-khaamosh tujh ko bhee koee afsaana aataa hai Tilism-e-taaza teraa saaya-e-deevaar rakhtaa hai Badaltaa hai paree kaa bhes jo deevaana aataa hai Ye azmat rah ke zaahid in buton men ham ne paa.ee hai Ki ka.aba ham ko lene taa-dar-e-mai-khaana aataa hai Do-rangee se naheen khaalee adam bhee soorat-e-hastee Koee hoshyaar aataa hai koee deevaana aataa hai Humaa yuun ustukhvaan-e-sokhta par mere girtaa hai TaDap kar sham.a par jaise koee parvaana aataa hai Udhar hain husn kee ghaaten idhar hain ishq kee baaten Tujhe afsoon to mujh ko use paree afsaana aataa hai Kalejaa haath se ahl-e-tama.a ke chaak hota hai Sadaf-aasaa agar mujh ko mayassar daana aataa hai Namak jallaad chhiDkaa chaahtaa hai mere zakhmon par Maze kaa vaqt ab ai himmat-e-mardaana aataa hai Zabardastee kaa dhaDkaa vasl men tum ko samaayaa hai Kidhar ho hosh men aao koee aayaa na aataa hai Ilaahee kis kee sham-e-husn se raushan hai ghar meraa Ki ban jaataa hai jugnoo aaj jo parvaana aataa hai Wo aashiq khaal-o-khat kaa hoon nazr-e-mor kartaa hoon Mayassar teesare din bhee jo mujh ko daana aataa hai 'ameer' aur aane vaalaa kaun hai gor-e-ghareebaan par Jo raushan sham.a hotee hai to haan parvaana aataa hai