apne ghar ki khidkii se main aasmaan ko dekhuungaa

Apne ghar kee khiDkee se main aasmaan ko dekhoongaa Jis par teraa naam likhaa hai us taare ko DhoonDoongaa Tum bhee har shab diyaa jalaa kar palkon kee dahleez pe rakhnaa Main bhee roz ik khvaab tumhaare shahr kee jaanib bhejoongaa Hijr ke Dariya men tum paDhnaa lahron kee tahreeren bhee Paanee kee har satr pe main kuch dil kee baaten likkhoongaa Jis tanhaa se peD ke neeche ham baarish men bheege the Tum bhee us ko chhoo ke guzarnaa main bhee us se lipToongaa Khvaab musaafir lamhon ke hain saath kahaan tak jaa.enge Tum ne bilkul Thiik kahaa hai main bhee ab kuch sochoongaa Baadal oDh ke guzroongaa main tere ghar ke aangan se Qaus-e-quzah ke sab rangon men tujh ko bheegaa dekhoongaa Be-mausam baarish kee soorat der talak aur duur talak Tere dayaar-e-husn pe main bhee kin-min kin-min barsoongaa Sharm se dohraa ho jaa.egaa kaan paDaa wo bundaa bhee Baad-e-sabaa ke lahje men ik baat men aisi poochhoongaa Safha safha ek kitaab-e-husn see khultee jaa.egee Aur usee kee lai men phir main tum ko azbar kar loongaa Vaqt ke ik kankar ne jis ko akson men taqseem kiyaa Aab-e-ravaan men kaise 'amjad' ab wo chehraa joDoongaa Apne ghar ki khiDki se main aasman ko dekhunga Jis par tera nam likha hai us tare ko DhunDunga Tum bhi har shab diya jala kar palkon ki dahliz pe rakhna Main bhi roz ek KHwab tumhaare shahr ki jaanib bhejunga Hijr ke dariya mein tum paDhna lahron ki tahriren bhi Pani ki har satr pe main kuch dil ki baaten likkhunga Jis tanha se peD ke niche hum barish mein bhige the Tum bhi us ko chhu ke guzarna main bhi us se lipTunga KHwab musafir lamhon ke hain sath kahan tak jaenge Tum ne bilkul Thik kaha hai main bhi ab kuch sochunga Baadal oDh ke guzrunga main tere ghar ke aangan se Qaus-e-quzah ke sab rangon mein tujh ko bhiga dekhunga Be-mausam barish ki surat der talak aur dur talak Tere dayar-e-husn pe main bhi kin-min kin-min barsunga Sharm se dohra ho jaega kan paDa wo bunda bhi Baad-e-saba ke lahje mein ek baat mein aisi puchhunga Safha safha ek kitab-e-husn si khulti jaegi Aur usi ki lai mein phir main tum ko azbar kar lunga Waqt ke ek kankar ne jis ko akson mein taqsim kiya Aab-e-rawan mein kaise 'amjad' ab wo chehra joDunga