daam e khushbuu men giraftaar sabaa hai kab se
— Amjad Islam Amjad
Daam-e-khushboo men giraftaar sabaa hai kab se
Lafz iz.haar kee uljhan men paDaa hai kab se
Ai kaDee chup ke dar o baam sajaane vaale
Muntazir koi sar-e-koh-e-nidaa hai kab se
Chaand bhee meree tarah husn-shanaasaa niklaa
Us kee deevaar pe hairaan khaDaa hai kab se
Baat kartaa hoon to lafzon se mahak aatee hai
Koee anfaas ke parde men chhupaa hai kab se
Shobada-baazi-e-aa.eena-e-ehsaas na poochh
Hairat-e-chashm vahee shokh qabaa hai kab se
Dekhiye Khoon kee barsaat kahaan hotee hai
Shahr par chhaa.ee huee surkh ghaTaa hai kab se
Kor-chashmon ke liye aa.eena-khaana maaloom
Varna har zarra tiraa aks-numaa hai kab se
Khoj men kis kee bharaa shahr lagaa hai 'amjad'
DhoonDtee kis ko sar-e-dasht havaa hai kab se
Dam-e-KHushbu mein giraftar saba hai kab se
Lafz izhaar ki uljhan mein paDa hai kab se
Ai kaDi chup ke dar o baam sajaane wale
Muntazir koi sar-e-koh-e-nida hai kab se
Chand bhi meri tarah husn-shanasa nikla
Us ki diwar pe hairan khaDa hai kab se
Baat karta hun to lafzon se mahak aati hai
Koi anfas ke parde mein chhupa hai kab se
Shobada-bazi-e-aina-e-ehsas na puchh
Hairat-e-chashm wahi shoKH qaba hai kab se
Dekhiye KHun ki barsat kahan hoti hai
Shahr par chhai hui surKH ghaTa hai kab se
Kor-chashmon ke liye aaina-KHana malum
Warna har zarra tera aks-numa hai kab se
Khoj mein kis ki bhara shahr laga hai 'amjad'
DhunDti kis ko sar-e-dasht hawa hai kab se