kisi ki aankh men khud ko talaash karnaa hai

Kisee kee aankh men khud ko talaash karnaa hai Phir us ke ba.ad hamen aa.inon se Darnaa hai Falak kee band galee ke faqeer hain taare! Ki ghuum phir ke yaheen se unhen guzarnaa hai Jo zindagee thee miree jaan! tere saath ga.ee Bas ab to umr ke naqshe men waqt bharnaa hai Jo tum chalo to abhee do qadam men kaT jaa.e Jo faasla mujhe sadiyon men paar karnaa hai To kyuun na aaj yaheen par qayaam ho jaa.e Ki shab qareeb hai aakhir kaheen Thaharnaa hai Vo meraa sail-e-talab ho ki teree ra.anaa.ee ChaDhaa hai jo bhee samundar use utarnaa hai Sahar huee to sitaaron ne muund liin aankhen Vo kya karen ki jinhen intizaar karnaa hai Ye khvaab hai ki haqeeqat khabar nahin 'amjad' Magar hai jiinaa yaheen par yaheen pe marnaa hai Kisi ki aankh mein KHud ko talash karna hai Phir us ke baad hamein aainon se Darna hai Falak ki band gali ke faqir hain tare! Ki ghum phir ke yahin se unhen guzarna hai Jo zindagi thi meri jaan! tere sath gai Bas ab to umr ke naqshe mein waqt bharna hai Jo tum chalo to abhi do qadam mein kaT jae Jo fasla mujhe sadiyon mein par karna hai To kyun na aaj yahin par qayam ho jae Ki shab qarib hai aaKHir kahin Thaharna hai Wo mera sail-e-talab ho ki teri ranai ChaDha hai jo bhi samundar use utarna hai Sahar hui to sitaron ne mund lin aankhen Wo kya karen ki jinhen intizar karna hai Ye KHwab hai ki haqiqat KHabar nahin 'amjad' Magar hai jina yahin par yahin pe marna hai