lahuu men rang lahraane lage hain

Lahoo men rang lahraane lage hain Zamaane khud ko duhraane lage hain Paron men le ke be-haasil uDaanen Parinde lauT kar aane lage hain Kahaan hai qaafila baad-e-sabaa kaa Dilon ke phuul murjhaane lage hain Khule jo ham-nasheenon ke garebaan Khud apne zakhm afsaane lage hain Kuchh aisa dard tha baang-e-jaras men Safar se qabl pachhtaane lage hain Kuchh aisi be-yaqeenee thee fazaa men Jo apne the wo begaane lage hain Havaa kaa rang niilaa ho raha hai Chaman men saanp lahraane lage hain Falak ke khet men khilte sitaare Zameen par aag barsaane lage hain Lab-e-zanjeer hai taa'beer jin kee Vo sapne phir nazar aane lage hain Khulaa hai raat kaa taareek jangal Aur andhe raah dikhlaane lage hain Chaman kee baaD thee jin kaa Thikaana Dil-e-shabnam ko dhaDkaane lage hain Bachaane aa.e the deevaar lekin 'imaarat hee ko ab Dhaane lage hain Khudaa kaa ghar tumheen samjho to samjho Hamen to ye sanam-khaane lage hain Lahu mein rang lahrane lage hain Zamane KHud ko duhrane lage hain Paron mein le ke be-hasil uDanen Parinde lauT kar aane lage hain Kahan hai qafila baad-e-saba ka Dilon ke phul murjhane lage hain Khule jo ham-nashinon ke gareban KHud apne zaKHm afsane lage hain Kuchh aisa dard tha bang-e-jaras mein Safar se qabl pachhtane lage hain Kuchh aisi be-yaqini thi faza mein Jo apne the wo begane lage hain Hawa ka rang nila ho raha hai Chaman mein sanp lahrane lage hain Falak ke khet mein khilte sitare Zamin par aag barsane lage hain Lab-e-zanjir hai ta'bir jin ki Wo sapne phir nazar aane lage hain Khula hai raat ka tarik jangal Aur andhe rah dikhlane lage hain Chaman ki baD thi jin ka Thikana Dil-e-shabnam ko dhaDkane lage hain Bachane aae the diwar lekin 'imarat hi ko ab Dhane lage hain KHuda ka ghar tumhin samjho to samjho Hamein to ye sanam-KHane lage hain