tajdiid

Ab mire shaane se lag kar kis liye rotee ho tum Yaad hai tum ne kahaa tha ''jab nigaahon men chamak ho Lafz jazbon ke asar se kaanpte hon aur tanaffus Is tarah uljhen ki jismon kee thakan khushboo bane To wo ghaDee ahd-e-wafa kee saa.at-e-naayaab hai Vo jo chupke se bichhaD jaate hain lamhe hain masaafat Jin kee khaatir paanv par pahre biThaatee hai Nigaahen dhund ke pardon men un ko DhoonDtee hain Aur samaa.at un kee meeThee narm aahaT ke liye Daaman bichhaatee hai'' Aur wo lamha bhee tum ko yaad hogaa Jab havaa.en sard thiin aur shaam ke maile kafan par haath rakh kar Tum ne lafzon aur ta.alluq ke na.e ma.anee bataa.e the, kahaa tha ''har ghaDee apnee jagah par saa.at-e-naayaab hai Haasil-e-umr-e-gurezaan ek bhee lamha nahin Lafz dhoka hain ki un kaa kaam iblaagh-e-ma.aanee ke alaava kuch nahin Vaqt ma.anee hai jo har lahza na.e chehre badaltaa hai Jaane vaalaa waqt saaya hai Ki jab tak jism hai ye aadmee ke saath chaltaa hai Yaad misl-e-nutq paagal hai ki is ke lafz ma.anee se tahee hain Ye jise tum gham aziyyat dard aansoo Dukh vaghaira kah rahe ho Ek lamhaatee ta.assur hai tumhaaraa vahm hai Tum ko meraa mashvara hai, bhuul jaao tum se ab tak Jo bhee kuch main ne kahaa hai'' Ab mire shaane se lag kar kis liye rotee ho tum! Ab mere shane se lag kar kis liye roti ho tum Yaad hai tum ne kaha tha Jab nigahon mein chamak ho Lafz jazbon ke asar se kanpte hon aur tanaffus Is tarah uljhen ki jismon ki thakan KHushbu bane To wo ghaDi ahd-e-wafa ki saat-e-nayab hai Wo jo chupke se bichhaD jate hain lamhe hain masafat Jin ki KHatir panw par pahre biThati hai Nigahen dhund ke pardon mein un ko DhunDti hain Aur samaat un ki miThi narm aahaT ke liye Daman bichhati hai Aur wo lamha bhi tum ko yaad hoga Jab hawaen sard thin aur sham ke maile kafan par hath rakh kar Tum ne lafzon aur talluq ke nae mani batae the, kaha tha Har ghaDi apni jagah par saat-e-nayab hai Hasil-e-umr-e-gurezan ek bhi lamha nahin Lafz dhoka hain ki un ka kaam iblagh-e-maani ke alawa kuch nahin Waqt mani hai jo har lahza nae chehre badalta hai Jaane wala waqt saya hai Ki jab tak jism hai ye aadmi ke sath chalta hai Yaad misl-e-nutq pagal hai ki is ke lafz mani se tahi hain Ye jise tum gham aziyyat dard aansu Dukh waghaira kah rahe ho Ek lamhati tassur hai tumhaara wahm hai Tum ko mera mashwara hai, bhul jao tum se ab tak Jo bhi kuch main ne kaha hai Ab mere shane se lag kar kis liye roti ho tum!