ab kahaan aur kisii chiiz kii jaa rakkhii hai
— Anwar Masood
Ab kahaan aur kisee chiiz kee jaa rakkhee hai
Dil men ik teree tamannaa jo basaa rakkhee hai
Sar-ba-kaf main bhee huun shamsheer-ba-kaf hai too bhee
Too ne kis din pe ye taqreeb uThaa rakkhee hai
Dil sulagtaa hai tire sard ravayye se miraa
Dekh is barf ne kyaa aag lagaa rakkhee hai
Aa.ina dekh zaraa kyaa main ghalat kahtaa huun
Too ne khud se bhee koee baat chhupaa rakkhee hai
Jaise too hukm kare dil miraa vaise dhaDke
Ye ghaDee tere ishaaron se milaa rakkhee hai
Mutma.in mujh se naheen hai jo ra.ee.yat meree
Ye miraa taaj rakhaa hai ye qabaa rakkhee hai
Gauhar-e-ashk se khaalee naheen aankhen 'anvar'
Yahee poonjee to zamaane se bachaa rakkhee hai