agle din kuchh aise honge
— Anwar Masood
Agle din kuchh aise honge
Chhilke phalon se mahnge honge
Nannhee nannhee chiyoonTiyon ke bhee
Haathee jaise saa.e honge
BhiiD to hogee lekin phir bhee
Suune suune raste honge
Phuul khulenge tanhaa tanhaa
JhurmuT jhurmuT kaanTe honge
Log use bhagvaan kahenge
Jis kee jeb men paise honge
Riit jalegee dhuup men 'anvar'
Barf pe baadal chhaa.e honge