bas ab tark e taalluq ke bahut pahluu nikalte hain
— Anwar Masood
Bas ab tark-e-ta.alluq ke bahut pahloo nikalte hain
So ab ye tai huaa hai shahr se saadhoo nikalte hain
Ham aa nikle ajab se ek sahraa-e-mohabbat men
Shikaaree ke ta.aaqub men yahaan aahoo nikalte hain
Ye ik manzar bahut hai umr bhar hairaan rahne ko
Ki miTTee ke masaamon se bhee rang-o-boo nikalte hain
Zameer-e-sang tujh ko teraa paikar-saaz aa pahunchaa
Abhee aankhen ubhartee hain abhee aansoo nikalte hain
Koee naadir khazeena hai mire dast-e-tasarruf men
JhapaTne ko dar-o-deevaar se baazoo nikalte hain
Main apne dushmanon kaa kis qadar mamnoon huun 'anvar'
Ki un ke shar se kyaa kyaa khair ke pahloo nikalte hain