bas yuunhii ik vahm saa hai vaaqia aisa nahiin
— Anwar Masood
Bas yoonhee ik vahm saa hai vaaqi.a aisa naheen
Aa.ine kee baat sachchee hai ki main tanhaa naheen
BaiThiye peDon kee utran kaa alaav taapiye
Barg-e-sozaan ke sivaa darvesh kuchh rakhtaa naheen
Uf chaTakhne kee sadaa se kis qadar Dartaa huun main
Kitnee baaten hain ki daanista jinhen sochaa naheen
Apnee apnee sab kee aankhen apnee apnee khvaahishen
Kis nazar men jaane kyaa jachtaa hai kyaa jachtaa naheen
Chain kaa dushman huaa ik mas.ala meree taraf
Us ne kal dekhaa thaa kyuun aur aaj kyuun dekhaa naheen
Ab jahaan le jaa.e mujh ko jaltee-bujhtee aarzoo
Main bhee is jugnoo kaa peechhaa chhoDne vaalaa naheen
Kaisee kaisee pursishen 'anvar' rulaatee hain mujhe
Ketiyon se kyaa kahoon main abr kyuun barsaa naheen