kaisii kaisii aayaten mastuur hain nuqte ke biich
— Anwar Masood
Kaisee kaisee aayaten mastoor hain nuqte ke biich
Kyaa ghane jangal chhupe baiThe hain ik daane ke biich
Rafta rafta rakhna rakhna ho ga.ee miTTee kee gend
Ab khaleejon ke sivaa kyaa rah gayaa naqshe ke biich
Main to baahar ke manaazir se abhee faarigh naheen
Kyaa khabar hai kaun se asraar hain parde ke biich
Ai dil-e-naadaan kisee kaa rooThnaa mat yaad kar
Aan Tapkegaa koee aansoo bhee is jhagDe ke biich
Saare akhbaaron men dekhoon haal apne burj kaa
Ab mulaaqaat us se hogee kaun se hafte ke biich
Main ne 'anvar' is liye baandhee kalaa.ee par ghaDee
Vaqt poochhenge ka.ee mazdoor bhee raste ke biich