main dekh bhii na sakaa mere gird kyaa gayaa thaa

Main dekh bhee na sakaa mere gird kyaa gayaa thaa Ki jis maqaam pe main thaa vahaan ujaalaa thaa Durust hai ki vo jangal kee aag thee lekin Vaheen qareeb hee dariyaa bhee ik guzartaa thaa Tum aa ga.e to chamakne lagee hain deevaaren Abhee abhee to yahaan par baDaa andheraa thaa Labon pe khair tabassum bikhar bikhar hee gayaa Ye aur baat ki hansne ko dil tarastaa thaa Sunaa hai log bahut se mile the raste men Miree nazar se to bas ek shakhs guzraa thaa Ulajh paDee thee muqaddar se aarzoo meree Dam-e-firaaq use roknaa bhee chaahaa thaa Mahak rahaa hai chaman kee tarah vo aa.eena Ki jis men too ne kabhee apnaa ruup dekhaa thaa GhaTaa uThee hai to phir yaad aa gayaa 'anvar' 'ajeeb shakhs thaa aksar udaas rahtaa thaa