merii qismat ki vo ab hain mire gam khvaaron men
— Anwar Masood
Meree qismat ki vo ab hain mire gham-khvaaron men
Kal jo shaamil the tire haashiya-bardaaron men
Zahr eejaad karo aur ye paiham socho
Zindagee hai ki naheen doosre sayyaaron men
Kitne aansoo hain ki palkon pe naheen aa sakte
Kitnee khabren hain jo chhaptee naheen akhbaaron men
Ab to dariyaa kee tabee.at bhee hai girdaab-pasand
Aur vo pahlee see sakat bhee naheen patvaaron men
Aap ke qasr kee jaanib koee dekhe tauba
Jurm saabit ho to chun deejiye deevaaron men
Aaj tahzeeb ke tevar bhee hain caron jaise
Dafan ho jaa.e na kal apne hee ambaaron men
Apnee aavaaz ko bhee kaan taraste hain mire
Jins-e-guftaar liye phirtaa huun baazaaron men
Tohmaten hazrat-e-insaan pe na dhariye 'anvar'
Dushmanee hai ki chalee aatee hai talvaaron men