shikva e gardish e haalaat liye phirtaa hai
— Anwar Masood
Shikva-e-gardish-e-haalaat liye phirtaa hai
Jis ko dekho vo yahee baat liye phirtaa hai
Us ne paikar men na Dhalne kee qasam khaa.ee hai
Aur mujhe shauq-e-mulaaqaat liye phirtaa hai
Shaakhcha TuuT chukaa kab kaa shajar se lekin
Ab bhee kuchh sookhe hue paat liye phirtaa hai
Sochiye jism hai ab ruuh se kaise rooThe
Apne saa.e ko bhee jo saat liye phirtaa hai
Aasmaan apne iraadon men magan hai lekin
Aadmee apne khayaalaat liye phirtaa hai
Partav-e-mahr se hai chaand kee jhilmil 'anvar'
Apne kaase men ye khairaat liye phirtaa hai