aaraam ke the saathii kya kya jab vaqt padaa to koi nahin
— Arzoo Lakhnavi
Aaraam ke the saathee kya kya jab vaqt paDaa to koee naheen
Sab dost hain apne matlab ke Dunya men kisee kaa koee naheen
Gul-gasht men daaman munh pe na lo nargis se hayaa kya hai tum ko
Us aankh se parda karte ho jis aankh men pardaa koee naheen
Jo baagh thaa kal phoolon se bharaa aTkheliyon se chaltee thee sabaa
Ab sumbul o gul kaa zikr to kya khaak uDtee hai us jaa koee naheen
Kal jin ko andhere se thaa hazar rahtaa thaa charaaghaan pesh-e-nazar
Ik sham.a jalaa de turbat par juz daagh ab itnaa koee naheen
Jab band huiin aankhen to khulaa do roz kaa thaa saaraa jhagDaa
Takht us kaa na ab hai taaj us kaa askandar o daaraa koee naheen
Qattaal-e-jahaan maashooq jo the suune paDe hain marqad un ke
Yaa marne vaale laakhon the yaa rone vaalaa koee naheen
Ai 'aarzoo' ab tak itnaa pataa chaltaa hai tiree barbaadee kaa
Jis se na bagoole hon paidaa is tarah kaa sahraa koee naheen