avval e shab wo bazm ki raunaq shama bhi thii parvaana bhi

Avval-e-shab wo bazm kee raunaq sham.a bhee thee parvaana bhee Raat ke aakhir hote hote khatm thaa ye afsaana bhee Qaid ko toD ke niklaa jab main uTh ke bagoole saath hue Dasht-e-adam tak jangal jangal bhaag chalaa veeraana bhee Haath se kis ne saaghar paTkaa mausam kee be-kaifee par Itnaa barsaa Toot ke baadal Doob chalaa mai-khaana bhee Ek lagee ke do hain asar aur donon hasb-e-maraatib hain Lau jo lagaa.e sham.a khaDee hai raqs men hai parvaana bhee Donon jaulaan-gaah-e-junoon hain bastee kya veeraana hai UTh ke chalaa jab koee bagoolaa dauD paDaa veeraana bhee Ghunche chup hain gul hain havaa par kis se kahiye jee kaa haal Khaak-nasheen ik sabza hai so apna bhee begaana bhee Husn o ishq kee laag men aksar chheD udhar se hotee hai Sham.a kaa sho.ala jab lahraayaa uD ke chalaa parvaana bhee Khoon hee kee shirkat wo na kyuun ho shirkat chiiz hai jhagDe kee Apnon se wo dekh raha hoon jo na kare begaanaa bhee Daur-e-masarrat 'aarzoo' apna kaisaa zalzala-aageen thaa Haath se munh tak aate aate chhooT paDaa paimaana bhee