ayaan hai be rukhii chitvan se aur gussa nigaahon se
— Arzoo Lakhnavi
Ayaan hai be-rukhee chitvan se aur ghussa nigaahon se
Payaam-e-khaamushee aur wo bhee do do nashr-gaahon se
Vabaal-e-jaan hai aisi zindagee jis men talaatum ho
MiTaa luun hausle phir tauba kar loongaa gunaahon se
Fazaa mahdood kab hai ai dil-e-vahshee falak kaisaa
NilaahaT hai nazar kee dekhte hain jo nigaahon se
Haqeeqat men nigaahon se koi manzil nahin bachtee
Guzarte dekhe hain gosha-nasheen tak shaah-raahon se
Tahee-dastaan-e-qismat ko na lenaa thaa na denaa thaa
Hisaab-e-zindagee kya hai ye poochho Baadshahon se
Hamen to jalte dil kee raushnee men aage baDhnaa hai
HaTaa do qumqume bijlee ke naa-hamvaar raahon se
Mire naalon ke sab shaakee koi un ko nahin kahtaa
Khurachte rahte hain jo zakhm-e-dil khoonee nigaahon se
Pilaa do zahr-e-gham dil ko na chhoDe gar havas-kaaree
Gunah wo ek achchhaa jo bachaa le sau gunaahon se
Hameen Kuch 'aarzoo' pher un kee baaton kaa samajhte hain
Jo haq-poshee men sach ko jhuuT karte hain gavaahon se