ganvaa ke dil saa guhar dard e sar khariid liyaa
— Arzoo Lakhnavi
Ganvaa ke dil saa guhar dard-e-sar khareed liyaa
Bahut garaan thaa ye sauda magar khareed liyaa
Ameen-e-ishq ne dil-e-be-khatar khareed liyaa
Ye aa.ina ma-e-aa.eena-gar khareed liyaa
Ghazab thaa ishq kaa sauda ki ahl-e-hosh ne bhee
Jo Kuch naseeb thaa sab bech kar khareed liyaa
Bhalaa ho gham kee tunuk-zarfee-e-tabee.at kaa
Agarche baat ganvaa dee asar khareed liyaa
Rah-e-razaa men hai khoonee-kafan se shaan-e-shaheed
To jaan bech ke rakht-e-safar khareed liyaa
Jo dil kahe na kahoon wo jo too kahe wo kahoon
To kya zameer bhee ai heela-gar khareed liyaa
Talaash-e-aish men ai 'aarzoo' hai ranj hee ranj
Sitam-naseeb ye kya dard-e-sar khareed liyaa