karam un kaa khud hai badh kar mirii hadd e iltijaa se

Karam un kaa khud hai baDh kar miree hadd-e-iltijaa se Mujhe soo-e-zan nahin hai ki duaa karoon khuda se Dil-e-mutma.in kee vus.at koi kam hai maa-sivaa se Mujhe kaahe kee kamee hai jo talab karoon khuda se Huee khatm gham kee aandhee vahee dil kee lau hai ab bhee Yahee sho.ala thaa wo sho.ala ki laDaa kiyaa havaa se Kahe kaun use patingaa jo hai sho.ale par dhuaan saa Tujhe le uDe hain kitnaa tire par zaraa zaraa se Jo hai sab kaa dene vaalaa main usee ko chaahtaa hoon Miree bhiik wo nahin hai ki mile kisee gadaa se Ye hai qasr-e-zindagaanee ki habaab-e-bahr-e-faanee Abhee ban gaya havaa se abhee miT gaya havaa se Ye khayaal khud hai aisa jo khushee banaa de gham ko Ki hai ibtidaa khushee kee mire gham kee intihaa se Miraa dil razaa pe raazee karam us kaa josh par hai Jo ab aa ga.ee zabaan tak to asar gaya duaa se Miree laakh minnaton par tiree ik hayaa hai bhaaree Koi parda hai wo parda ki hile-Dule havaa se Tire paak-baaz-e-ulfat nahin haarne ke himmat Jo marenge Doob kar bhee to marenge rah ke pyaase Kisee dil kee aas yuun bhee kabhi 'aarzoo' na TuuTe Ye kahe banee hai dam par wo kahe miree balaa se