kyuun kisi rah rau se puuchhuun apnii manzil kaa pataa
— Arzoo Lakhnavi
Kyuun kisee rah-rau se poochhoon apnee manzil kaa pataa
Mauj-e-Dariya khud lagaa letee hai saahil kaa pataa
Hai nishaan-e-laila-e-maqsood mahmil kaa pataa
Dilrubaa haath aa gaya paayaa jahaan dil kaa pataa
Raah-e-ulfat men samajh lo dil ko goongaa rahnumaa
Saath hai aur de nahin saktaa hai manzil kaa pataa
Kahtaa hai naaseh ki vaapas jaao aur main saada-lauh
Poochhtaa hoon khud usee se koo-e-qaatil kaa pataa
Raahbar rahzan na ban jaa.e kaheen is soch men
Chup khaDaa hoon bhuul kar raste men manzil kaa pataa
Aa.ee ik awaaz-e-teer aur niklee dil se uf
Phir na qaatil kaa nishaan paayaa na bismil kaa pataa
Baankee-chitvan vaale mahshar men hazaaron hain to hon
Mil hee jaa.egaa kisee soorat se qaatil kaa pataa
Us jagah bismil ne dam toDaa jahaan kee khaak thee
Yuun lagaate hain lagaane vaale manzil kaa pataa
Poochhne vaale ne ye poochhaa ki kyuun be-dil ho kyuun
Aur mujh ko mil gaya kho.e hue dil kaa pataa
Maujen Takraa.ee huiin dushman bhee nikleen dost bhee
Peechhe kashtee ko Dhakelaa de ke saahil kaa pataa
Rah gaya hai Toot kar zakhm-e-jigar men teer-e-naaz
Ab lagaa lenaa nahin dushvaar qaatil kaa pataa
Sokhta parvaane kushta sham.a farsh-e-daaghdaar
De rahe hain raat kee garmee-e-mahfil kaa pataa
Main wafa-kesh 'aarzoo' aur wo wafa-naa-aashnaa
PaD gaya mushkil men paa kar apnee mushkil kaa pataa