miir e mahfil na hue garmii e mahfil to hue

Meer-e-mahfil na hue garmee-e-mahfil to hue Sham.a-e-taabaan na sahee jaltaa huaa dil to hue Na sahee khaak ke putlon men sifaat-e-malakee Baare is baar-e-wafa ke mutahammil to hue Hausle dil ke mohabbat men jo piste hee rahe Kar ke himmat tire ghamzon ke muqaabil to hue Purshis-e-gham-zadagaan bahr-e-tafannun hee sahee Khair se aap bhee is bazm men shaamil to hue Be-asar aah se bhee itnee tasallee hai zaroor Munh takaa karte the jo wo kisee qaabil to hue Aan rakh lee tiree shamsheer-e-adaa kee yuun bhee Jin ko marnaa naheen aataa thaa wo bismil to hue Sanad-e-sabr sahee paak dilon ke naasoor Aise maqtool bhee ik tarah ke qaatil to hue Rashk-e-dushman kee talaafee ko ye pahloo naheen kam Gham-e-jaan-kaah-e-mohabbat ke wo qaatil to hue Khud se dukh mol len ye kaam Kuch aasaan na thaa Khaa ke ik choT maze dard ke haasil to hue Khud-kushee men to khalal 'aarzoo' aayaa lekin Haath un ke miree gardan men hamaa.il to hue