mirii nigaah kahaan diid e husn e yaar kahaan

Miree nigaah kahaan deed-e-husn-e-yaar kahaan Ho aitbaar to phir taab-e-intizaar kahaan Dilon men farq huaa jab to chaah pyaar kahaan Chaman chaman hee nahin aa.egee bahaar kahaan Jise ye kah ke wo hans den ki qissa achchhaa hai Wo raaz khul ke bhee hota hai aashkaar kahaan Umang thee ye javaanee kee yaa koi aandhee Milaa ke khaak men ham ko ga.ee bahaar kahaan Umeed-vaar banaane se mudda.aa kya tha Jab aas tum ne dilaa dee to ab qaraar kahaan Milee hai is liye do-chaar din kee aazaadee Ki sarf kartaa hai dekhen ye ikhtiyaar kahaan Ye shauq le ke chalaa hai chaman se shakl-e-naseem Ki dekhen miltee hai jaatee huee bahaar kahaan Hai ek shart wafa kee wo qaid-e-be-zanjeer Sab ikhtiyaar hain aur kuch bhee ikhtiyaar kahaan MiTe nishaan pe nazar kar ke ro jise chaahe Tire sitam kee hai turbat miraa mazaar kahaan Tum aisa ahd-shikan 'aarzoo' saa naa-ummeed Kaho jo sach bhee to aataa hai aitbaar kahaan