nazar us chashm pe hai jaam liye baithaa hoon
— Arzoo Lakhnavi
Nazar us chashm pe hai jaam liye baiThaa hoon
Hai na piine kaa ye matlab ki piye baiThaa hoon
Rakhna-andaazi-e-andoh se ghaafil nahin main
Hai jigar chaak to kya honT siye baiThaa hoon
Kya karoon dil ko jo lene nahin deta hai qaraar
Jo muqaddar ne diyaa hai wo liye baiThaa hoon
Iltifaat ai nigah-e-hosh-rubaa ab kyuun hai
Paas jo Kuch thaa wo pahle se diye baiThaa hoon
Dil-e-pur-kaif salaamat ki akele men bhee
Ek botal se baghal garm kiye baiThaa hoon
'aarzoo' jalte hue dil ke sharaare hain ye ashk
Aag paanee ke kaToron men liye baiThaa hoon