qurbat badhaa badhaa kar be khud banaa rahe hain

Qurbat baDhaa baDhaa kar be-khud banaa rahe hain Main duur haT raha hoon wo paas aa rahe hain E.ajaaz-e-paak-baazee hairat men laa rahe hain Dil mil gaya hai dil se pahloo judaa rahe hain Wo dil se gham bhulaa kar dil ko lubhaa rahe hain Guzre hue zamaane phir phir ke aa rahe hain Siine men zabt-e-gham se chhaalaa ubhar raha hai Sho'le ko band kar ke paanee banaa rahe hain Ai be-khudee kahaan hai jaldee miree khabar le Bhoole the jo ba-mushkil phir yaad aa rahe hain Len kaam zabt se kya ulTaa hai dil kaa phoDaa Utnaa ubhar raha hai jitnaa dabaa rahe hain Furqat men saaz-e-raahat saamaan 'azaab kaa hai ThanDee havaa ke jhonke kya jee jalaa rahe hain Hain husn ke karishme kya inqalaab-aageen Gham-khvaar jo the kal tak ab khaar khaa rahe hain Khud in kee justujoo men ham duur bhaage varna Wo kab alag rahe hain wo kab judaa rahe hain Le le ke ThanDee saansen poochho na haal dekho Tum bhed kholte ho aur ham chhupaa rahe hain Dekh 'aarzoo' ye ronaa shaana hilaa hilaa kar Too aaj khvaab men hai aur wo jagaa rahe hain