wo ban kar be zabaan lene ko baithe hain zabaan mujh se

Wo ban kar be-zabaan lene ko baiThe hain zabaan mujh se Ki khud kahte nahin kuch aur kahlavaate hain haan mujh se Bahut kuch husn-e-zan rakhtaa hai meraa mehrbaan mujh se Ki tohmat dhar ke hai khvaahaan-e-taa.eed-e-bayaan mujh se Kisee gul kee qabaa miltee nahin tahreeq se khaalee Junoon ne le ke baanTee hain ye kitnee dhajjiyaan mujh se Pilaa saaqee ki rah jaa.e khumaar-e-kaif kaa parda Bas ab rukteen nahin aatee huee angDaa.iyaan mujh se Jo gul ko gul na samjhoge to kaanTon hee men uljhoge Na do apne ko dhokaa aap ho kar bad-gumaan mujh se Bahut jaldee na kar ai chashm-e-tar kuch der ko dam le Bayaan karnaa wo too rah jaa.e jitnee daastaan mujh se Misaal-e-sham.a apnee aag men kya aap jal jaaon Qisaas-e-khaamushee legee kahaan tak ai zabaan mujh se Huiin taa-der pahchaanee huee awaaz men baaten Wo kuch kuch khul chale hain rakh ke parda darmiyaan mujh se Tasavvur kee nazar pardon ke roke ruk nahin saktee Bataa o jaane vaale chhup ke jaa.egaa kahaan mujh se Agar ai 'aarzoo' har saans dil kee aah ban jaa.e Na hogee khatm phir bhee meree lambee daastaan mujh se