ye daastaan e dil hai kya ho adaa zabaan se

Ye daastaan-e-dil hai kya ho adaa zabaan se Aansoo Tapak rahe hain lafzen milen kahaan se Hai rabt do dilon ko be-rabtee-e-bayaan se Kuch wo kahen nazar se kuch ham kahen zabaan se Ye rote rote hansnaa tarteeb-e-zikr-e-gham hai Aayaa hoon ibtidaa par chheDaa tha darmiyaan se Haasil to zindagee kaa thee zindagee yaheen kee Ab main hoon ik janaaza uThvaa do aastaan se Is tool-e-khaamushee kaa zor-e-bayaan bhee dekhaa Thee baat mere dil kee niklee tiree zabaan se Jab husn khud-numaa hai aur ishq rakhna-afgan Is kashmakash men parda niklegaa darmiyaan se Maidaan-e-imtihaan men ai be-gharaz mohabbat Dil kee zameen too ne Takraa dee aasmaan se Us raazdaar-e-gham kee haalat na poochh jis ko Kahnaa to hai bahut kuch mahroom hai zabaan se Ai jazb-e-shauq-e-manzil mamnoon-e-ghair kyuun hon Khud raasta badal kar bichhDaa hoon kaarvaan se Har gaam par ThiThaknaa har baar muD ke taknaa O muskuraane vaale kya le chalaa yahaan se Zaahir fareb-e-va.ada phir aitbaar itnaa Wo likh gaya dilon par jo kah diyaa zabaan se Aa.ankhon se baaghbaan kee sho.ale nikle rahe hain Tinke dabaa.e munh men niklaa hoon aashiyaan se Dil kaa sakoon ganvaa kar hon aarzoo pashemaan Kuch le ke rakh na chhoDaa kyuun jins-e-raa.egaan se