yuun duur duur dil se ho ho ke dil nashiin bhi

Yuun duur duur dil se ho ho ke dil-nasheen bhee Hain to isee jahaan men milte nahin kaheen bhee Kam ek qabr se hai mujh ko ye kul zameen bhee Mar rehne kaa Thikaanaa miltaa nahin kaheen bhee Toofaan-e-bahr khud hain baDhtee umangen dil kee Kashtee qaraar legee ho kar na tah-nasheen bhee Imkaan kee had ke andar koshish kee had se baahar Dil jis ko DhoonDhtaa hai wo hai bhee aur nahin bhee Ummeed-e-dil kee fitrat hai be-niyaaz taskeen Kam ho na be-qaraaree aa.e agar yaqeen bhee Beem-o-rajaa se dil men Dariya kaa jazr-o-mad hai Saahil-navaaz maujen aa.iin bhee aur ga.iin bhee Ye multafit nigaahen sheva vighaa hai jin kaa Hain mojib-e-sukoon bhee hangaama-aafreen bhee Kar pahle dil pe qaaboo jaame kee phir khabar le Daaman bachaane vaale jaatee hai aasteen bhee Khatre men jaan jis se wo jaan se bhee pyaaraa Rangeen-ezaar sho.ala qaatil bhee hai haseen bhee Sar-gashta-e-mohabbat daar-e-mehan men phir kar Dekh aa.e gosha gosha raahat nahin kaheen bhee Nairangee-e-talavvun laa-hal saa ik muamma Samjhe jo tere tevar paDh le khat-e-jabeen bhee Shaan-e-ghuroor un kee tasveer ik rukhee hai Aur aarzoo kee nazren shaidaa bhee hain haseen bhee