abhii havas ke hazaaron bahaane zinda hain
— Asad Badayuni
Abhee havas ke hazaaron bahaane zinda hain
Na.ee ruton men shajar sab puraane zinda hain
Fazaa-e-mehr-o-mohabbat kee daagh-daaree ko
Dhuaan ugalte hue kaar-khaane zinda hain
Mujaaviraan-e-tamannaa to mar ga.e kab ke
Daroon-e-jism ka.ee aastaane zinda hain
Javaaz koi nahin hijraton se bachne kaa
Ham is dayaar men kis ke bahaane zinda hain
Ajab tilism hai jangal ke un darakhton kaa
Parinde mar bhee chuke aashiyaane zinda hain
Khudaa.iyon men milegaa gadaa-e-ishq kaa taaj
Sar-zameen to havas ke zamaane zinda hain