dil o nazar ko lahuu men dubonaa aataa hai
— Asad Badayuni
Dil-o-nazar ko lahoo men Dubonaa aataa hai
Na ab hansee hamen aa.e na ronaa aataa hai
Havaa ke haath charaaghon se khelte hain yoonhee
Ki haath bachchon ke jaise khilaunaa aataa hai
Ham ahl-e-zar ke daron par qadam nahin rakhte
Gadaa-e-khaak hain miTTee pe sonaa aataa hai
Khumaar-e-dar-ba-dree chain se na rehne de
Jo khvaab aataa hai aksar salonaa aataa hai
Ghazal ke sher hain mufrad magar wo shaa.ir hai
Jise sab ek laDee men pironaa aataa hai