dilon par khauf bhii taarii bahut hai
— Asad Badayuni
Dilon par khauf bhee taaree bahut hai
Magar jangon kee tayyaaree bahut hai
Khirad kee bastiyon ke phoonkne ko
Junoon kee ek chingaaree bahut hai
Sabhee zad men hain dasht-o-koh-o-insaan
Ye zarb-e-vaqt hai kaaree bahut hai
Puraanaa khushk pattaa kah rahaa thaa
Havaa men tez-raftaaree bahut hai
Ham apne dil kee duniyaa dekhte hain
Hamen ye shaghl-e-bekaaree bahut hai
Chale ho us se milne par ye sun lo
Use shauq-e-dil-aazaaree bahut hai
Naheen hai saath rahnaa garche aasaan
BichhaDne men bhee dushvaaree bahut hai