mire log khema e sabr men mire shahr gard e malaal men
— Asad Badayuni
Mire log khema-e-sabr men mire shahr gard-e-malaal men
Abhee kitnaa vaqt hai ai khudaa in udaasiyon ke zavaal men
Kabhee mauj-e-khvaab men kho gayaa kabhee thak ke ret pe so gayaa
Yoonhee umr saaree guzaar dee faqat aarzoo-e-visaal men
Kaheen gardishon ke bhanvar men huun kisee chaak par main chaDhaa huaa
Kaheen meree khaak jamee huee kisee dasht-e-barf-misaal men
Ye havaa-e-gham ye fazaa-e-nam mujhe khauf hai ki na Daal de
Koee parda meree nigaah par koee rakhna tere jamaal men