nazar uthaa ke jo dekhaa udhar koii bhii na thaa
— Asad Badayuni
Nazar uThaa ke jo dekhaa udhar koee bhee na thaa
Sulagtee dhoop kee sarhad pe ghar koee bhee na thaa
Har ek jism thaa ik poster shu'aa'on kaa
Sulagte dasht men ThanDaa shajar koee bhee na thaa
Chamakte din men to sab log saath the lekin
Udaas shab men miraa ham-safar koee bhee na thaa
Har ek shahr men thaa iztiraab kaa aaseb
Jahaan sukoon ho aisa nagar koee bhee na thaa
Sabhee ko fann-e-jaraahat se vaaqafiyyat thee
Hamaaree tarah vahaan be-hunar koee bhee na thaa
Sab apne kamron men mastee kee niind so.e the
Siyaah shab men sar rahguzar koee bhee na thaa
Jo talkh shaam ke saayon ko qatl kar detaa
Tamaam-shahr men itnaa niDar koee bhee na thaa
Mire zavaal kee sab ko thee aarzoo 'as.ad'
Mire kamaal se khush-dil magar koee bhee na thaa