ye log khvaab bahut karbalaa ke dekhte hain
— Asad Badayuni
Ye log khvaab bahut karbalaa ke dekhte hain
Magar ghaneem ko gardan jhukaa ke dekhte hain
Sunaa hai barf-ruten raushnee se Dartee hain
So ik charaagh ko ham bhee jalaa ke dekhte hain
Unhen kaho ki kabhee jangalon kee samt bhee aa.en
Jo bastiyon men karishme khudaa ke dekhte hain
Junoon men koee izaafa naheen hai muddat se
Ghubaar-e-jism bhee ab ke uDaa ke dekhte hain
Ye dil hai Thahree huee jhiil kee tarah kab se
Ab is men phir koee patthar giraa ke dekhte hain
Phir ik khayaal ko zanjeer kar diyaa ham ne
Phir ek naam ko dil se miTaa ke dekhte hain