zamiin ko aasmaan likkhaa gayaa hai
— Asad Badayuni
Zameen ko aasmaan likkhaa gayaa hai
Yaqeenon ko gumaan likkhaa gayaa hai
Jo kahnaa thaa kabhee munh se na niklaa
Jo likhnaa thaa kahaan likkhaa gayaa hai
Udaasee kaa qaseeda is baras bhee
Sar-e-deevaar-e-jaan likkhaa gayaa hai
Charaaghon ko havaaon kaa payambar
Khamoshee ko zabaan likkhaa gayaa hai
Mire lafzon se itnee barhamee kyuun
Bahut kuchh raa.egaan likkhaa gayaa hai