siine men un ke jalve chhupaae hue to hain

Siine men un ke jalve chhupaa.e hue to hain Ham apne dil ko tuur banaa.e hue to hain Taaseer-e-jazb-e-shauq dikhaa.e hue to hain Ham teraa har hijaab uThaa.e hue to hain Haan kya huaa wo hausla-e-deed-e-ahl-e-dil Dekho naa wo naqaab uThaa.e hue to hain Tere gunaahgaar gunahgaar hee sahee Tere karam kee aas lagaa.e hue to hain Allaah-ree kaamyaabee-e-aavaargaan-e-ishq Khud gum hue to kya use paa.e hue to hain Yuun tujh ko ikhtiyaar hai taaseer de na de Dast-e-du'aa ham aaj uThaa.e hue to hain Zikr un kaa gar zabaan pe naheen hai to kya huaa Ab tak nafas nafas men samaa.e hue to hain MiTte huon ko dekh ke kyuun ro na den 'majaaz' Aakhir kisee ke ham bhee miTaa.e hue to hain