alaava ik chubhan ke kya hai khud se raabta meraa
— Aziz Bano Darab Wafa
Alaava ik chubhan ke kya hai khud se raabta meraa
Bikhar jaataa hai mujh men Toot ke har aa.eena meraa
Ulajh ke mujh men apne-aap ko suljhaa raha hai jo
Na jaane khatm kar baiThe kahaan par silsila meraa
Mujhe chakhte hee kho baiThaa wo jannat apne khawabon kee
Bahut miltaa huaa thaa zindagee se zaa.iqa meraa
Main kal aur aaj men haa.el koee naadeeda vaqfa hoon
Mire khawabon se naapaa jaa raha hai faasla meraa
Wo kaisaa shahr thaa maanoos bhee thaa ajnabee bhee thaa
Ki jis kee ik galee men kho gaya mujh se pataa meraa
PalaT aataa hai har din ghar kee jaanib shaam Dhalte hee
Kisee be-naam bastee se guzar ke raastaa meraa
Ye main hoon yaa miraa saaya miraa saaya hai yaa main hoon
Ajab see dhund men lipTaa huaa hai haafiza meraa
Hansee aa.ee thee apnee bebasee par ek din mujh ko
Abhee tak goonjtaa hai mere andar qahqaha meraa