lahuu se uth ke ghataaon ke dil baraste hain
— Aziz Bano Darab Wafa
Lahoo se uTh ke ghaTaaon ke dil baraste hain
Badan chhaton kee tarah dhoop men jhulaste hain
Ham aise peD hain jo Chaaon baandh kar rakh den
Shadeed dhoop men khud saa.e ko taraste hain
Har ek jism ke chaaron taraf samundar hai
Yahaan ajiib jazeeron men log baste hain
Sabhee ko dhun hai ki sheeshe ke baam-o-dar hon magar
Ye dekhte nahin patthar abhee baraste hain
Bahaa ke le gaya sailaab raaste jin ke
Wo shahr apne khayaalon men ab bhee baste hain
Ma.aal kya hai ujaalon ke un dafeenon kaa
Jinhen chhuen to andheron ke naag Daste hain
Ajiib log hain kaaghaz kee kashtiyaan gaD.h ke
Samundaron kee balaa-kheziyon pe hanste hain