mire mizaaj ko suuraj se jodtaa kyuun hai
— Aziz Bano Darab Wafa
Mire mizaaj ko sooraj se joDtaa kyuun hai
Main dhoop hoon mujhe naahaq sikoDtaa kyuun hai
Agar ye sach hai ki too meraa khvaab hai to bataa
Ki aankh lagte hee mujh ko jhinjhoDtaa kyuun hai
Udhar bhee too hai idhar bhee jo sirf too hee hai
To phir ye biich kee deevaar toDtaa kyuun hai
Main tere va.ade ko jab aansuon se dhotee hoon
Har ek lafz tiraa rang chhoDtaa kyuun hai
Magar ye dil hai ki kya jaane teree baaton se
Tarah tarah ke bahaane nichoDtaa kyuun hai