phuunk denge mire andar ke ujaale mujh ko
— Aziz Bano Darab Wafa
Phoonk denge mire andar ke ujaale mujh ko
Kaash dushman miraa qindeel banaa le mujh ko
Ek saaya hoon main haalaat kee deevaar men qaid
Koi suraj kee kiran aa ke nikaale mujh ko
Apnee hastee kaa kuch ehsaas to ho jaa.e mujhe
Aur nahin kuch to koi maar hee Daale mujh ko
Main samundar hoon kaheen Doob na jaaon khud men
Ab koi mauj kinaare pe uchhaale mujh ko
Tishnagee meree musallam hai magar jaane kyuun
Log de dete hain TuuTe hue pyaale mujh ko