thakan se chuur hoon lekin ravaan davaan hoon main

Thakan se chuur hoon lekin ravaan-davaan hoon main Na.ee sahar ke charaaghon kaa kaarvaan hoon main Havaa.en mere varaq lauT lauT detee hain Na jaane kitne zamaanon kee daastaan hoon main Har ek shahr-e-nigaaraan samajh raha hai mujhe Zaraa qareeb se dekho dhuaan dhuaan hoon main Kisee se bhiiD men chehra badal gaya hai miraa To saare aa.ina-khaanon se bad-gumaan hoon main Main apnee guunj men khoee hoon ek muddat se Mujhe khabar naheen Kuch kaun hoon kahaan hoon main Khud apnee diid se mahroom hai nazar meree Azal se soorat-e-nazzaara darmiyaan hoon main Miraa vajood-o-adam raaz hai hamesha se Vahaan vahaan bhee naheen hoon jahaan jahaan hoon main