wo ik nazar se mujhe be asaas kar degaa

Wo ik nazar se mujhe be-asaas kar degaa Mire yaqeen ko meraa qayaas kar degaa Main jab bhee us kee udaasee se uub jaa.oongee To yuun hansegaa ki mujh ko udaas kar degaa Milaa ke mujh se nigaahen wo meree nazron ke Zaraa see der men khaalee gilass kar degaa Phir is tarah se rahegaa mire khayaalon men Ki meree pyaas ko Dariya kee pyaas kar degaa Main us kee gard haTaate hue bhee Dartee hoon Wo aa.eena hai mujhe khud-shanaas kar degaa Main us ke saamne uryaan lagoongee Dunya ko Wo mere jism ko meraa libaas kar degaa Wo maahtaab-sifat sirf raushnee hee nahin Mujhee ko raat kaa manzar bhee khaas kar degaa