wo ye kah kah ke jalaataa thaa hamesha mujh ko

Wo ye kah kah ke jalaataa thaa hamesha mujh ko Aur DhoonDegaa kaheen mere alaava mujh ko Kis qadar us ko saraabon ne sataayaa hogaa Duur hee se jo samajhtaa raha chashma mujh ko Meree ummeed ke sooraj ko Dubo ke har shaam Wo dikhaataa raha Dariya kaa tamaasha mujh ko Jab kisee raat kabhee baith ke mai-khaane men Khud ko baanTegaa to degaa miraa hissa mujh ko Phir sajaa degaa wo yaadon ke ajaa.ib-ghar men Soch kar ahd-e-junoon kaa koee sikka mujh ko Mere ehsaas ke dozakh men sulagne ke liye ChhoD degaa mire khvaabon kaa farishta mujh ko Phir ye hogaa ki kisee din kaheen kho jaa.egaa Ik doraahe pe biThaa ke miraa rasta mujh ko Log kahte hain ki jaadoo kee saDak hai maazee MuD ke dekhoongee to ho jaa.egaa sakta mujh ko Sabz mausam kee inaayat kaa bharosaa bhee naheen Kab uDaa de ye havaa jaan ke pattaa mujh ko Vaqt haakim hai kisee roz dilaa hee degaa Dil ke sailaab-zada shahr pe qabza mujh ko Main na lailaa hoon na rakhtaa hai wo majnoon kaa mizaaj Us ne chaahaa hai magar mere alaava mujh ko