baat karnii mujhe mushkil kabhi aisii to na thii

Baat karnee mujhe mushkil kabhi aisi to na thee Jaisee ab hai tiree mahfil kabhi aisi to na thee Le gaya chheen ke kaun aaj tiraa sabr o qaraar Be-qaraaree tujhe ai dil kabhi aisi to na thee Us kee aankhon ne khuda jaane kiyaa kya jaadoo Ki tabee.at miree maa.il kabhi aisi to na thee Aks-e-rukhsaar ne kis ke hai tujhe chamkaayaa Taab tujh men mah-e-kaamil kabhi aisi to na thee Ab kee jo raah-e-mohabbat men uThaa.ee takleef Sakht hotee hamen manzil kabhi aisi to na thee Paa-e-koobaan koi zindaan men nayaa hai majnoon Aatee awaaz-e-salaasil kabhi aisi to na thee Nigah-e-yaar ko ab kyuun hai taghaaful ai dil Wo tire haal se ghaafil kabhi aisi to na thee Chashm-e-qaatil miree dushman thee hamesha lekin Jaisee ab ho ga.ee qaatil kabhi aisi to na thee Kya sabab too jo bigaDtaa hai 'zafar' se har baar Khoo tiree hoor-shamaa.il kabhi aisi to na thee